మామిడిపండ్లతో ఈ కాంబినేషన్లు అదుర్స్!

భారత్‌లో వేసవి కాలం గరిష్ఠ స్థాయికి చేరడంతో, మామిడి పండ్ల సీజన్ కూడా ఊపందుకుంది. ఈ నేపథ్యంలో, మామిడి పండ్లను కేవలం డెజర్ట్‌లు లేదా పానీయాలకే పరిమితం చేయకుండా, రోజువారీ భోజనంలో భాగంగా ఆస్వాదించే సంప్రదాయ పద్ధతులపై మళ్లీ ఆసక్తి పెరుగుతోంది. 'ది హిందూ' కథనం ప్రకారం... దేశవ్యాప్తంగా ప్రాచుర్యం పొందిన కొన్ని ప్రత్యేకమైన కాంబినేషన్లు ఇవే:

పెరుగన్నం - మామిడి పండు: తెలుగు రాష్ట్రాల్లో ఇది చాలా ఇష్టమైన కాంబినేషన్. వేసవిలో భోజనం ముగించడానికి ఇది ఒక అద్భుతమైన ఎంపికని రెస్టారెంట్ నిర్వాహకుడు సంపత్ తుముల పేర్కొన్నారు. కమ్మనైన, రుచికరమైన పెరుగన్నం, మామిడి పండులోని తియ్యదనంతో కలిసి అద్భుతమైన అనుభూతిని ఇస్తుంది.

పప్పు, అన్నం, మామిడి: అసోంలో చాలా కుటుంబాలు మసూర్ పప్పు, ఉడికించిన అన్నం, బంగాళాదుంప మ్యాష్‌తో పాటు తాజా మామిడి పండు ముక్కలను కలిపి తింటాయి. మామిడి పండ్ల సీజన్‌లో ఇది చాలా సులభమైన, రుచికరమైన భోజనం.

ఆమ్రస్ - పూరీ/రోటీ: గుజరాతీ, మహారాష్ట్ర సంప్రదాయాల్లో మామిడి పండ్ల గుజ్జును (ఆమ్రస్) పూరీలతో కలిపి అందిస్తారు. ముఖ్యంగా బోహ్రా కమ్యూనిటీలో, పాలు కలిపిన ఆమ్రస్‌ను ఉదయం అల్పాహారంలో భాగంగా రోటీలు లేదా చపాతీలతో తింటారు.

మ్యాంగో సలాడ్: తరిగిన మామిడి ముక్కల్లో కొద్దిగా ఉప్పు, పచ్చి మిరపకాయలు కలిపి తయారుచేసే స్వీట్ అండ్ సోర్ మ్యాంగో సలాడ్ కూడా మంచి ఆప్షన్. దీన్ని స్నాక్‌గా లేదా డిప్‌గా కూడా ఉపయోగించవచ్చు.

అటుకులు - మామిడి: ఒడిశాలో పాలు, చక్కెరలో నానబెట్టిన అటుకులను (పోహా) మామిడి పండు ముక్కలు, తురిమిన కొబ్బరితో కలిపి అల్పాహారంగా తీసుకుంటారు. ఇది ఎంతో సంప్రదాయ రుచిని అందిస్తుంది.

రవ్వ పొంగల్/కేసరి - మామిడి: తీపి రవ్వ పొంగల్ లేదా రవ్వ కేసరిపై మామిడి పండు ముక్కలు వేసుకుని తినడం కూడా ఒక విభిన్నమైన అనుభూతిని ఇస్తుంది. దీని రుచి తప్పకుండా అందరికీ నచ్చుతుంది.

ఈ ఉదాహరణలన్నీ భారతీయ వేసవి వంటకాల్లో మామిడి పండుకు ఉన్న ప్రాధాన్యతను తెలియజేస్తున్నాయి. విస్తృతంగా లభించే ఈ పండును స్థానిక సంప్రదాయాలకు అనుగుణంగా ప్రజలు ఎలా ఆస్వాదిస్తున్నారో స్పష్టం చేస్తున్నాయి.